ANIMAL - NON SERVIUM

Güei miré a los güeyos a la cruda realidá, los errores de la mio vida naide los pue borrar.

Foi tan cenciello, dexalu escapar, y da-y rienda suelta a esti animal.

¡Animal! Que llevo dientro... ¡dende va tantu tiempu!

Y que siempres m'emburrió a ser llibre como'l vientu.

Él enxamás me dexó siguir la dirección que desaguaba nuna vida meyor.

Amosóme otru camín, lloñe de la cordura, un camín marcáu pola llocura.

¡Llocura! Tan dura, capaz, d'a min volvéme llocu.

Quemar hasta sentir… ¡El fueu nel infiernu!

¿Por qué? La vida ye la que te da ¿Y qué? Equí toi yo pa encarar los mios problemes.

Va tiempu qu'encaré'l mio destín, siempre tuvi claro cual yera'l mio papel.

Entendí, que nesta perra vida enxamás daría el mio brazu a torcer.

Siempre supi que los mios propios valores son tan distintos a los qu'ellos me venden.

Y de xacíu, por nada del mundu acabaría siendo ún más d'esa xente...

Yo barrí pa siguir el ritmu que supuestamente lleva un home normal...

Escoyí vivir cada momentu, esfrutar de la vida a toa velocidá.

Nada ye de baldre too pasa factura munches vegaes al preciu de los mios propios escesos.

Forxé'l mio destín pa bien o pa mal, si la vida me cute, ¡ENSÉÑO-Y LOS DIENTES!

Lo que nun mos mata fainos más fuertes, y nun esiste un peligru mayor qu'el que vive na mio mente...

Por munchos golpes duros que reciba, ¡Nun me van doler! Porque enxamás conocí un dolor más fuerte, que'l que se siente cuando yes consciente de que-y tas faciendo dañu a la to propia xente.

Nunca quixi asonsañar ser daquién que nun soi, aparentar daqué que realmente nun siento.

Caún ye dueñu de les sos propies acciones, caún toma...¡Les sos propies decisiones!

Avérate hasta min y suelta la to charra moral.

Mientres me mires penriba del costazu.

Avérate... Que yo voi respondete, una vegada más...¡Que te den!

Dalgún día toos vamos tener que pagar el preciu por ser distintos.

Llegáu esi momentu, con gustu aceptalu...

Voi  encaxar los golpes ensin mirar atrás.

Nun llevo'l preciu de los mios errores, pero enxamás, ¡Enxamás voi dexar de ser yo!